Við tökum virkan þátt í þróun íslenskrar baðmenningar.
Laugarvatn liggur yfir heitum reit og er jarðvegurinn þar kraumandi af sjóðandi vatni sem notað hefur verið til matargerðar, baða og húshitunar kynslóðum saman.
Nýtt og endurbætt baðlón opnar í Fontana sumarið 2026. Breytingar á aðstöðunni í Fontana fela meðal annars í sér nýja sánu, endurbætur á búningsklefum, laugar sem teygja sig að vatninu og nýja hveragufu beint yfir einum kröftugasta hvernum. Breytingunum er ætlað að upphefja sögu svæðisins og náttúruna í kring.
Saga gufubaða í Mývatnssveit á rætur sínar að rekja til fyrri alda en í dag er henni haldið á lofti í nútímalegu umhverfi Jarðbaðanna við Mývatn. Þar er gestum frá öllum heimshornum boðið að upplifa íslenska náttúru og gestrisni.
Framkvæmdir standa yfir á aðstöðu Jarðbaðanna við Mývatn þar sem ný bygging rís, auk þess sem baðaðstaða verður bætt og stækkuð. Hönnun byggingarinnar og nýja lónsins tekur mið af einstakri náttúru Mývatnssveitar. Nýja byggingin er felld inn í umhverfið og grjót af svæðinu er nýtt í kanta, klæðningar, veggi og gólf. Gestir munu geta gengið beint ofan í lónið úr búningsklefum og ferðast um þrjú mismunandi svæði. Einnig bætist við grjótgufubað, foss, nýr bar og hraungjá sem skilur á milli svæða.
